Språk

 

Finnmárkku fylkkagielda nanne Davvi-Norgga girjjálašvuođa

Finnmárkku fylkkadiggi dohkkehii gaskavahku Davvi-Norgga girjjálašvuođastrategiija 2017 - 2021. Davvi-Norgga girjjálašvuođa strategiija mihttomearri lea nannet buvttadan- ja gaskkustandoaimmaid davvinorgga girjjálašvuođas. Finnmárkku fylkkagielda háliida nannet davvinorgga girjjálašvuođa lagaš gulahallamis berošteddjiiguin ja čálliiguin, lágádusaiguin, festiválaiguin, girjerádjosiin ja eará buvttadeddjiiguin ja gaskkusteddjiiguin.

Deaddil ja stuora govva ihtáLaila Stien hálešteamen Rønnaug Ryssdalain. Sonja Siltala, Finnmark fylkesbibliotek

Girječállistipeanddat ja movttiidahttinruđat Davvi-Norgga girječálliide
Ođđa girjjálašvuođastrategiijas lea várrejuvvon 100 000 kruvnnu čáppagirjjálašvuođa girječálliid stipeanddaid várás, ja 150 000 kruvnnu fas movttiidahttinstipeanddaide čalmmustahttit Davvi-Norgga girječálliid iešguđet oktavuođain. Muhto lea vel okta ášši maid fertet dahkat ovdal go almmuhat dáid ruđaid, dadjá Finnmárkku fylkkagirjerádjohoavda, Heikki Knutsen. Davvi-Norgga girjjálašvuođastrategiija lea oassi Davvi-Norgga kulturšiehtadusas, ja Riikkaoasseráđđi kultuvrra várás fertejit gávdnat čovdosa movt kulturšiehtadusa galgá viidáset fievrridit ja ođasmahttit, ja de ferte kulturšiehtadus oktan ruhtademiin dohkkehuvvot dien golmma fylkkadikkis. Mun doaivvun diet áššit leat sajis čakčii, lohká Knutsen.

Finnmárkku fylkkagirjerádju doaibmá čállingoddin Davvi-Norgga girjjálašvuođastrategiija čađaheamis ja áigu ovttasbarggus dien guovtti eará fylkkagirjerádjosiin, ja earáiguin girjjálašvuođabirrasis, álggahit girjjálašvuođastrategiija guoskevaš doaimmaid.

Finnmárkku fylkkadiggi mearridii vel lasáhusa ahte fylkkagirjerádjosat sáhttet bagadallat Davvi-Norgga girječálliid iešguđet stipeanddaid ja stipeandaortnegiid hárrái, ja sáhttet maid veahkehit hábmet stipeandaohcamušaid. Mii fertet geahčadit movt dien galgá čuovvulit, dadjá Finnmárkku fylkkagirjerádjohoavda. Dáid doaimmaid barget dábálaččat Davvi-Norgga girječálliidsearvi ja Girječálliidguovddáš, mat ožžot ruhtadoarjagiid dákkár bargguide.