Språk

 

Lihkostuvvat priváhta arkiivvaid gádjumis

Deaddil ja stuora govva ihtáFinotro as nammaš geađgejuolgefitnodaga arkiivva oassi Báhcavuonas. Fotogovva: Finnmárkku fylkkagirjerájus

innmárkkuarkiivvat leat čohkken dokumeanttaid eanet go 60 priváhta arkiivvas.

Dat čohkken lea "Vi er også her! Synliggjøring av glemte grupper" ("Mii leat maid dáppe! Vajáldahttojuvvon joavkkuid oainnusmahttin") nammasaš prošeavtta oassi maid Finnmárkkuarkiivvaid arkiivafágalaš fierpmádat lea álggahan.

Priváhtaarkiivat leat arkiivvat mat leat dahkkojuvvon priváhta suorggis - ja daid leat ráhkadan fitnodagat, searvvážat, searvvit, priváhta ásahusat dahje ovttaskas olbmot. Prošeavtta okta áŋgiruššansuorgi lea leamaš dokumeanttaid čohkken fitnodatarkiivvain.

Viežžan eanet go 60 priváhta arkiivva

- Prošeavttas mii leat vurken earret eará dokumeanttaid dehálaš geađgejuolgefitnodagain guolástusindustriijas ja boazodoalus, muitala arkivára Marja Helena Maliniemi Finnmárkku fylkkagirjerádjosis.

Čohkkenáigodagas čohkkejuvvojedje eanet go 60 priváhta arkiivva ja dasto vel čađahuvvojedje jearahallamat. Jearahallamat galget ollistit dievasin arkiivaávdnasiid mat leat čohkkejuvvon. Fotogovat maid govviduvvojedje.

Oassi buktojuvvon arkiivvain ordnejuvvojedje, katalogiserejuvvojedje ja almmuhuvvojedje čohkkenáigodagas Arkivportalen (Arkiivauskkádat) ja Archives portal Europe nammasaš arkiivaportálain. Ja nu dat leat olámuttos geavaheddjiide máilmmi miehtá.

Čájáhus lágiduvvo

Prošeavtta gaskkustanoassi álggahuvvo čakčat. Čohkkejuvvon ávdnasat galget dalle lágiduvvon čájáhussan ja preanttusin álbmoga várás.

- Prošeakta lea álggahan proseassaid mat galget dahkat olbmuid diđolažžan ja juohkit dakkár dieđuid álbmogii mat gusket Finnmárkku priváhta arkiivvaid gádjumii. Prošeavtta bokte lea priváhta suorgi ge boahtán diehtit mat gádjunásahusaid fylkkas leat, ja ahte sidjiide lea vejolaš addit arkiivvaid daidda, dadjá Maliniemi.

Háliidit joatkit arkiivvaid čohkkema

Vaikko vel prošeaktaáigodat jo lea nohkan, de váldá fylkkagirjerájus ain vuostá dokumeanttaid priváhta suorggis.

- Menddo maŋŋit ii leat ii eisege buktit ávdnasiid. Mii čohkket ain arkiivvaid priváhta suorggis Finnmárkkus, ja mii ávžžuhit sin geat háliidit addit arkiivvaid, váldit minguin oktavuođa, dadjá Maliniemi.